أستاذنك بسافر أيام واجيك
وان طالت ايام السفر لا تحاتي
حتى و لو طولت ماني مخليك
ياللي بدونك ويش تسوا حياتي
تامر على حاجه؟؟ باودعك واليك
عسى عوض الأيام في المقبلاتِ
حتى يدي ما ودها تفارق يديك
ساكت وانا اشوف البلا في سكاتي
ما شفتني لا رحت منك التفت فيك
بلاي والله روحتي والتفاتي
لكن قبل ما اروح ودي أوصيك
وانت الوحيد اللي يقدر وصاتي
لاحدٍ سألك و قال لك وين مغليك
قل له لوازم لا قضاها بياتي
و أن طروا النسيان ماني بناسيك
يا راس مالي في الحياة وغناتي
و ان طروا السلوان ماني بساليك
طيفك معي حتى وانا في صلاتي
قلبي وهو قلبي إذا مر طاريك
لولا ضلوعي كان عزوا مماتي
لو جض صدري كان يمديه ياتيك
و يبات عندك ويهنا بالمباتي
أنا .. و قلبي .. و الغلا .. ساكنٍ فيك
و انته .. و قلبك .. و الغلا .. وسط ذاتي
غلاك مثل الحكم عند المماليك
أكبر طموحي .. لا .. كل أمنياتي
شف في غيابي أي حاجه تسليك
لأني بعدك أسلى مع ذكرياتي
أحاول اذكر أي شيٍ يطريك
واقول هو سوى وانا ذي سواتي
كني موادع كل شيٍ حواليك
و كني حسبت حساب حزة وفاتي
أحب لأني ما اقدر انساك و أبيك
و لا اقدر أخليك ياللي تحاتي
معنى أحب .. و ما اقدر أنسى .. و أخليك
يعني بدونك ويش تسوا حياتي

يامحمد أخلص لاتطولها وهات المختصر
لاتنشد الا من مياه النيل وبرج القاهرة
لاعاد تسألني وش اللي مبطي" بي في مصر
ليت العيون النايمه سوت سوات الساهره
البارحه عند العصر ما كن حن عند العصر
غشى سواد الليل عين اللي زمانه قاهره
من يوم شفت أم العيون السود ضامرة الخصر
وانا اتحاشى شوفها والا عيوني جاهره
علي الحرام ان كنها تعصر معاليقي عصر
إلى استمال عويدها اللي كن ربي صاهره
لو ان ماهي تستاهل ان زين الملا فيها حصر
ماكان حتى عروقها من خلف يديها ظاهره
قامت وقام الناس ومن جاء بيتعدها قصر
حسبي عليها ان كنها على التغنج ماهره
خلت جماهير الهلال اتشلشل أعلام النصر
نادي النصر من لبسها شهر وربي شاهره
لو اني معها في عريش أخير من بيت وقصر
منزالها يسمو على كل البيوت الباهره
هذي مصر وإذا بغيت تعرف وش معنى مصر
أشرب مياه النيل والا ذب برج القاهره

يكبر قسى جرح السنين ويعني
رجل الحزين اللي على حد الإدراك
هذا أنا يوم أخلف الوقت ظني
الحزن حزني والسوايا سواياك
بكيت وأبكيت العيون وبكني
تعال شفني كل ما حان ذكراك
كم واحدٍ جاني بعدك وسألني
شخبار من حبيت وأقفى وخلاك؟
وأصد والحزن الخفي ممتحني
وأن قلت منهو قيل ماهوب يخفاك
قيل العوض قلت العوض ما شحني
والله لا هذا ولا ذا ولا ذاك
يا ما بعضهم مرني ما فتني
يا جعل ماهم بالعوض في محياك
الله لا يجبر عزا من عذلني
ما جاه ما جاني ولا جاه ما جاك
واللي عذل ويقول (لو و لو أني)
جعل يعشق له واحدٍ كنه إياك
ما فيه شيٍ في حياتي غبني
الا نهار أقفيت وأنا أسمع إبكاك
الله من جرحٍ قديمٍ مكني
أمداك نزفه لكن ادواه ما أمداك
عليّ كم جار الزمان وطعني
أسمع صدى صوت المعاليق تنخاك
وين أنت ياللي كل ما غبت كني
واقف على باب الأمل وأتحراك
ليتك تعرف تخون وأقول خني
على الأقل القى سبب وأتنساك
وليت الزمن فمحبتك ما خذلني
وليت الهجر من طيب خاطرك ورضاك
لو أن قربك والوصل بالتمني
ما غبت عن عيني كثر ما اتمناك
خايف يطول البعد وتسج مني
وياخذ مكانك شخص ماهوب يسواك
وش عاد أسوي يومك أقفيت عني
لا أنا أتبع المقفي ولا أحب فرقاك

يالله دخيلك من الضيقات والحكره
إلى أنكسر خاطر الغالي ولا جبّر
لاضاق صدر الحزين وشاف مايكره
لا أحتال يصبر على الضيقه ولا صبّر
ياللي غلاك بضميري عام محتكره
ماهوب ينقاس ولو ينقاس ما شبّر
عليك مشروهي اللي مالك بذكره
من وين . . والا شقول . . وكيف بعبّر
عطيت وجهي زماني بس من مكره
يقبل بشره عليّ وخيره مدبّر
ياليت بكره درا باللي بعد بكره
كان أحتملنا الزمن لو جوه مغبّر
الحمد لله على فضله ومن شكره
كلما عسرني الزمان أدعيه وأكبّر
(يالأمبراطور) مابه شي نفتكره
الا مساء الأربعاء وحمدان ما خبّر
ذا فندق الريتز وذا الكورنيش والوكره
تشهد على ضيقة اللي راح ما عبّر
لا صار ما أنت بكفو للحب لا تكره
من يصغر بعين خلق الله ما كبّر
أرحل لو أن الرحيل أعظم من السكره
بقزر اللي بقى من الوقت وأعبّر
أبعد وأنا ببتعد لكن على فكره
محبتي لك تواضع وأنت متكبّر
الحر إلى من جزع ثم طار من وكره
وا لله مايلتفت ما دامه مدبر

تخيل أن الله بغى وشاء القدر هو والظروف
وقال القدر أختار أما في نظرك أو مسمعك


يعني أذا أخترت النظر كن الحكي ماله حروف
ولا أذخترت السمع أسمع ولا كني معك


ما أقدر أشوفك ما أسمعك ولا أسمعك من دون أشوف
يا أسمعك وأنا أشوفك أو أشوفك وأسمعك


النعمتين مكمله فرحة لقاء أغلى هنوف
شوفك وصوتك مطمعي قبل أعرف وش مطمعك


وجدي وجد أللي اخيه بتالي القوم محذوف
عليك قبل أوادعك واكف باقي مدمعك


من الغلا في ذمتي أن كنك في ذا القلب مغروف
شفت البحر مثل البحر ماهوب حولي أجمعك


الله وهبني محبتك سبحان المعطي الرؤوف
وصارت حياتي كلها وهمي الوحيد أبقى معك


وأذا أراد الله وشاء وشاء القدر هو والظروف
أبسمعك وأنا أشوفك أو أشوفك وأسمعك

يا الله يا مستجيب لدعوة الداعي
إليا دعيتك بدعواتي تقبلها
يا من لك أرقابنا لرضاك خضاعي
لوجهك وغير وجهك ما ننزلها
تبطي بعثرة قدم رجلي ووقاعي
في عين من يحتريها ويتحبلها
البارحه لا ني بنايم ولا واعي
ما أمسيت نفسي تجادلني واجادلها
أدرس وأفكر وأراجع بعض الأوضاعي
والنفس من كثرة التفكير مشغلها
ماني على الهون والحقران مطواعي
والسالفه قمت أفسرها وأحللها
يا كود حوالي ويا هون مطلاعي
دامي من اللي رفيعات" منازلها
يبيد حيل الزمن ما يلوي ذراعي
ياللي تبي حاجة" ما انت بمحصلها
الحزن ما همني يا شين الأطباعي
أن كان به كلمة" في خاطرك قلها
لا تحسب أن الرعيه مالها راعي
كرامتي عزها من عز ناقلها
الكون ما ضاق بي وفجوجه اوساعي
أبخس فجوج الخلا وأعرف مداهلها
لو جار حزني علي وكسر أضلاعي
ما ضقت لو تستضيق الأرض بأكملها
ما عاد كلمة أحبك تطرب أسماعي
وصورتك ما عاد به شي" يجملها
تدري وش اللي عرفته يوم وداعي
أنك ما تستاهل الرفقه من أولها
صحيح بعض المشاعر مالها داعي
لكن ذي غلطتي وأنا أتحملها

الاروع حضووورك غ ـلاوي
يسلمو على الحضور
المميز غ ـلاوي

بنت ايووي
الاروع حضورك
وتميز اطلالتك
في صفحتي المتواضعه
يسلموو على المرور
كوني بالقرب دائما